دوامه سوده ودايره تحت وفوق
والدنيا بحر غويط وعالي الموج
لكن ما دام في القلب حب وشوق
مهما ميزان الدنيا كان معووج
لابد يوم يصفى الزمان ويروق
ودي حكمة الأيام
,,,
كلام يجر كلام
وأيام تجر أيام
وشهور تجر شهور
ودهور ,, يفوت أعوام
كلام وفيه كلمه مكفنه وضلمه
وكلمه في الضلمه
قنديل وبحر علام
,,,
القلب مخطوف ,,, خوف
يادي المتاهه اللي بلا نهايه
خايف أخطي في بير غطاه مكشوف
أضيع ,,, تضيع أحلامي ويايا
,,,
الضلمه ضلمه والعمى ضلمه
يارب , عالنور أمتى تجمعني
أمتى أخطي الضلمه بالكلمه
وأقول وكل الدنيا تسمعني
,,,
محبوس أنا وعمايا في الأوضه
والعتمه حوالين مني مفروده
والسكه أودام مني مسدوده
والدنيا دي , كل الدنيا دي ! سوده
,,,
من كل ناحيه طواني الهم وكواني
والآه في القلب نار والحزن خواني
أنا بسألك يا أله الأرض والسموات
ياللي بتحيي نبات الأرض بعد موات
تحيي رجايا أنا اللي ما حد ساواني
,,,
صوتك معايا وعطرك بيسري في دمايا
ياأخت روحي ياضي هوايا وسمايا
ياصوت بيفرش بطريقي حجات ونور وزهور
عديني سور وحدتي وتوهاني , وعمايا
,,,
كلمات لعميد الأدب العربي "طه حسين"
